هذول اْحنا أبدْ ما كنّا مختلفينْ ولا في يوم غيّرنا مطارحنا هذول احنا
هذول احنا بشرْ إحنا مثل كلّ البشرْ إحنا ظُلُم يوقعْ على لِعباد يجرحنا واذا الأحوال سرّتنا تبحبحنا وإن مالت بنا الأيّام كابرنا على المحنه هذول احنا
هذول احنا على دعوة رضا بنّام وعلى زفّة شهيد بدمّو يتمخترْ تلاقي عيونّنا فزّت وصَحْصَحنا هذول احنا
هذول احنا صبرنا كثير عالهجرانْ والتشريد في البلدان سَوّحنا ونار الوجد للرجعة بتلفَحنا هذول احنا
هذول احنا مَ حدّ يقول تَمْسحنا بشر إحنا مثل كلّ البشر إحنا ولكنْ غَدَرنا العيد وما طلطلْ وحَيّدْ عن حوارينا فَتحنا قلوبنا لأجلو ، وما ميَّلْ وطوّلْ ليلنا طوّلْ وعتم القهرِ بنجومو على عيون الخلِقْ حوّلْ وخلّى نهارنا كحلي وبسَمات الصّبايا دموعْ تتحوّلْ وتحلمْ يومٍ بماردْ شديد وفاتل الساعدْ يِجي من بيدر العشّاق تَ يعوّض خسارتنا ويربّحنا يجرّ الشّمِسِ بايدينو يخلّيها على اجرين العجايز تركع وتبكي تِصافحنا وتِصالحنا هذول احنا
هذول احنا بشرْ إحنا مثل كلّ البشرْ إحنا اليوم وبُكره رحْ نبقى مثل ما بالأمِسْ كنّا فلسطينيّة موجوعينْ ولكن ضحكة الأطفال من سابع بحور الموت تحيينا وتفرحنا هذول احنا
هذول احنا بشرْ إحنا مثل كلّ البشرْ إحنا مطرْ ينزل بسنة المَحل نسماتو تفرفحنا ورِد يتعربش الحيطان عبير زهورو بالنشوة يفحفحنا عجوز عيونها بالقوّة بتشعشعْ تفرّحنا عروس بثوبها الأبيض وسط الاحزان ترفرف بينا فوق الغيم تشلحنا صبي مبسوط يوم العيد لون البسمة عَ خدودو بيذبحنا بِنت ترقص بلعبتها على حبال الهوى والله تمرجِحنا نراقبهم بطرف العين والدمعات جوّه العين تفضحنا هذول احنا
هذول احنا وليل نهار نتطلّعْ علوّا عيدنا يرجعْ وننسى الماضي الموجّعْ بيوم نصوّب المدفعْ على الغازي ونتجمّعْ تحت راية وطنْ بالحب تجمعنا وتسلّحنا هذول احنا
نورس فلسطين
المشرف العام
عدد الرسائل : 7626 العمر : 51 الحالة الاجتماعية : متزوج المستوى التعليمي/العمل : مكتبة وهدايا الهوايات : كل شيء جميل : تاريخ التسجيل : 09/03/2008
الأربعاء أبريل 09, 2008 11:08 pm